बझाङ प्रदेश सभा १ को उपनिर्वाचनमा झन्डै आधा मत खसेको छ । यहाँ ६१ हजार ७ सय ६८ मतदाता रहेकोमा ३० हजार ३ सय २८ मत खसेको मुख्य निर्वाचन अधिकृत सुदर्शन लामिछानेले जानकारी दिए । उनका अनुसार ४९.१२ प्रतिशत मत खसेको छ ।
बझाङमा ९३ मतदान केन्द्र र ७४ मतदान स्थल तोकिएका थिए । सबैमा शान्तिपूर्ण वातावरणमा सम्पन्न भएको मुख्य निर्वाचन अधिकृत लामिछानेले बताए । उनका अनुसार अहिले मत पेटिका ल्याउने काम भइरहेको छ । साइपाल गाउँपालिका– वडा नम्बर ३,४,५ बाहेक अरू वडा र स्थानीय तहका मतपेटिका मतगणना स्थल सदरमुकाम चैनपुर तर्फ लिने काम भइरहेको छ । ती तीन वडाको मत पेटिका भोली हेलिकप्टर मार्फत ल्याइने मुख्य निर्वाचन अधिकृत लामिछानेले बताए ।
मतपेटिका आएपछि सर्वदलीय बैठक बस्ने र भोली दिउसोबाटै मतगणना सुरु गर्ने तयारी भएको उनले बताए । बझाङमा ११ जना चुनावी मैदानमा छन् । उनीहरु मध्ये कांग्रेस र एमाले र माओवादी केन्द्र बिच तीव्र प्रतिस्पर्धा हुने आकलन गरिएको छ ।
दुर्गम स्थानमा रहेका कम्तिमा तीनवटा मतदान केन्द्रको मतपेटिका हेलिकोप्टरबाट ल्याउनुपर्ने, तर मौसम खराब रहेकाले तत्काल ल्याउन नसकिने अवस्था रहेको मुख्य निर्वाचन अधिकृत सुदर्शन लामिछानेले बताएका हुन्रु । लामिछानेका अनुसार आज भएको उपनिर्वाचनमा करिब ५० प्रतिशत मत खसेको छ । साइपाल गाउँपालिका लगायत विकट स्थानमा फोन सम्पर्क हुन नसकेकाले एकीन तथ्याङ्क संकलन नभइसकेको उनले जानकारी दिए ।
‘भौगोलिक विकटताका कारण आज नै जिल्लामा मतपेटिकाहरू संकलन गर्न नसकिएला जस्तो छ, आजै मत गणना हुँदैन,’ लामिछानेले भने, ‘साइपाल गाउँपालिकामा रहेका पाँच मतदान केन्द्रमध्ये तीन केन्द्रको मतपेटिका हेलिकोप्टरबाट सदरमुकाम ल्याउनुपर्ने हुन्छ, त्यसकारण शनिबार नै सबै मतपेटिका जम्मा गरेर मत गणना गरिहाल्न सम्भव छैन ।’
लामिछानेका अनुसार साइपाल गाउँपालिकाको धूली, काँडा र एराङकुरीडाँडाको मतपेटिका हेलिकोप्टरबाट ल्याउनुपर्छ । मौसमले साथ दिए धूली र काडाँको मतपेटिका आजै सदरमुकाम चैनपुर ल्याउने प्रयास भइरहेको छ । तर मौसम बदली भइरहेकाले एराङकुरीडाँडाको मतपेटिका ल्याउन नसकिने स्थिति रहेको उनको भनाइ छ । उनका अनुसार नेपाली सेनाको हेलिकोप्टर बझाङको सदरमुकाम पुगे पनि मौसम खराब भएकाले तीनवटा मतदान केन्द्रको मत सदरमुकाम ल्याउन समस्या छ ।
-1734829640.jpg)
